Handritin til barnanna

---

Handritasamkeppni Árnastofnunar var haldin í samstarfi við Sögur – verðlaunahátíð barnanna í tilefni af því að 21. apríl 2021 voru liðin 50 ár frá því að fyrstu handritin komu heim frá Danmörku.

Hátt í hundrað handrit bárust í keppnina. Dómnefnd sem skipuð var þeim Gísla Sigurðssyni, Arndísi Þórarinsdóttur og Goddi tók til starfa í byrjun apríl og skoðaði handrit frá grunnskólanemum víðs vegar að af landinu.

​Hér má sjá hvaða handrit dómnefnd taldi skara fram úr. Höfundar þeirra fá viðurkenningu senda heim að dyrum. Við þökkum öllum fyrir þátttökuna og óskum unga handritagerðarfólkinu til hamingju.

Mögulegt er að stækka myndir og lesa textann með því að ýta á plús. Einnig má fletta þeim handritum sem eru í bókarformi.

Anna Björg Jörundsdóttir

​Laugarnesskóli

---

„Fallegt, djúpviturt og hjartnæmt verk sem vinnur með miðaldafyrirmyndir og leikur með sniðug orð og hreinar hugsanir“.

Anton Arnarsson Werth

​Ísaksskóli

---

„Framúrskarandi frumlegar teikningar og góð skrift á skemmtilegri og fyndinni sögu um pirruðu hafgúfuna úr undirdjúpunum“.

Sara Lind Magnúsdóttir

​Grunnskóli Drangsness

---

„Náttúran verður hluti af þessu verki þar sem björt mynd af Grímsey á utanverðum birkiberkinum kallast á við vísuna að innanverðu“.

Árdís Eva Björnsdóttir

 Laugarnesskóli

---

„Persónuleg og frumleg saga af því hvernig lífið hefði getað verið hjá Snorra litla Sturlusyni þegar hann var að alast upp í Odda – sem sækir fyrirmyndir í myndlýsingar miðaldahandrita og nútímavæðir þær á flottan hátt“.

Ísabel Bergljót Gísladóttir

Laugarnesskóli 

---

„Glæsilega ort og listilega upp sett draumljóð“.

Bergþóra Hildur Andradóttir

Laugarnesskóli

---

„Spennandi, áhugaverð og kraftmikil goðsaga sem nýtir sér klassíska uppsetningu texta í handritum, með skrautlegum upphafsstöfum og snyrtilegri skrift svo þéttskrifaður textinn verður myndrænn gjörningur“.

Jóhann Frans, Hilmar Freyr, Duro Stefan, Jakob Jóel, Dawid Jozef

Grunnskóli Hornafjarðar

---

„Æsileg og fjörlega myndlýst saga sem geislar af ímyndunarafli og metnaði höfunda“.

Alódía Svövudóttir Petit

Ísaksskóli

---

„Kraftmikil og vönduð teikning af eldspúandi dreka sem virðist hafa öðlast líf og beinlínis brennt gat á blaðið sem hann er teiknaður á. Meðfylgjandi texti magnar upp myndina með því að fanga hina goðfræðilegu heimsmynd og tala beint inn í hinn gjósandi nútíma á Reykjanesskaganum“.

Sigríður Sigurpálsdóttir

Mýrarhúsaskóli

---

„Frumsamin og fróðleg samantekt um lækningajurtir ásamt teikningum; nosturs- og sniðuglega bundin inn í krossviðarspjöld með útsaumaðri fyrirsögn“.

Karólína Waagfjörð

Kerhólsskóli

---

„Heil bók með textum og fjölbreyttu myndefni sem er ýmist skemmtilega teiknað eða líflega klippt saman“.

Kristján Nói Kristjánsson

Hagaskóli

---

„Vönduð bók með fornlegu yfirbragði utan um djúpvitrar hugleiðingar um heimspekilegar spurningar um lífið og tilveruna með vel orðuðum kenningum í fallega útprentuðum texta“.

Óskar Jóhannsson

Laugarnesskóli

---

„Áhugavert sjónarhorn og tenging við núverandi aðstæður, um að tölvuleikjaframleiðendur hafi blómstrað í faraldrinum; sett fram í dálkum með fallega lýstum upphafsstaf og COVID-veirunni fyrir neðan – sem vekur hugrenningatengsl við miðaldir og þær plágur sem þá herjuðu“.

Vésteinn Heiðarr Sigurðarson

Höfðaskóli 

---

„Grípandi teiknimyndasaga með eigin stíl og innblástur úr gömlu útlagasögunum þar sem allt getur gerst“.

---

Verkefnið er styrkt af Barnamenningarsjóði, Þróunarsjóði námsgagna, Landsvirkjun, Nýsköpunarsjóði námsmanna og er unnið í samstarfi við fjölmarga aðila, t.d. Barnamenningarhátíð í Reykjavík, Bókmenntahátíð í Reykjavík, Reykjavík-Bókmenntaborg, RÚV ohf., Sögur – verðlaunahátíð barnanna, Arndísi Þórarinsdóttur rithöfund, List fyrir alla, Menningarmiðstöðina Edinborg á Ísafirði, Sláturhúsið á Egilsstöðum, Listasafn Árnesinga í Hveragerði, Menningarhúsið Berg á Dalvík og fleiri.